1Sa 11 | ZomZIV | STEP | Ammon-te Nahash kuanto in Jabesh Gilead a umcih hi. Tua ciangin Jabesh mite khempeuh in, “Ko tawh thukimna hong bawl in, na nasem kong suak ding uh hi,” a ci uh hi.

1 Samuel 11

Saul in Jabesh Khuapi Hukhia

1 Ammon-te Nahash kuanto in Jabesh Gilead a umcih hi. Tua ciangin Jabesh mite khempeuh in, “Ko tawh thukimna hong bawl in, na nasem kong suak ding uh hi,” a ci uh hi. ^a

2 Ahi hangin Ammon-te Nahash in, “Note khempeuh na taklam mit uh khelkhia-in Israel khempeuh tungah minsiatna no tunga tunsakna bek tawh thukimna no tawh ka bawl ding hi,” ci-in a dawng hi. ^b

3 Jabesh upate in ama kiangah, “Israel khempeuh tungah kamtai ka sawl theih nadingun ni sagih sung hong pia in; kote hong hu ding a om kei leh no tungah kong lut ding uh hi,” a ci uh hi.

4 Saul omna khua Gibeah ah kamtaite tung uh a, hih thukimna mite a zaksak uh ciangin mi khempeuh nakpipi in a kap uh hi. 5 Tua laitak lianin Saul a bawngtalte nung zui-in lo panin a ciah hi. Amah in, “Mite in bang siatna tuak uh hiam? Bang hangin kap uh ahi hiam?” ci-in a dong hi. Tua ciangin amaute in Jabesh mite thugen a gen uh hi. ^c

6 Saul in amaute thugen a zak ciangin Pasian Kha vanglianin ama tungah tunga a heh mahmah hi. 7 Amah in bawngtal kap khat la a semnenin, Israel-te omna khempeuh ah kamtai sawla, “Saul le Samuel a zui lo peuhmah hih bawngtalte bangin kibawl ding hi,” ci-in a tangkosak hi. Tua ciangin TOPA kihtakna mite tungah tunga khekhatkhai bangin amaute a kuankhia uh hi. 8 Saul in Bezek ah Israel mite a kaihkhop ciangin tul zathum pha uh a, Judah mite tul sawmthum a pha uh hi. ^d

9 Amaute in kamtai-a paite kiangah, “Jabesh mite kiangah, ‘Zing ciang nisat hunin note hong kihukhia ding hi,’ na ci un,” a ci uh hi. Kamtaite pai-in Jabesh mite kiangah hih thu a zaksak uh ciangin a nuam mahmah uh hi. 10 Amaute in Ammon-te kiangah, “Zing ciangin kong lut ding uh a, no hoihsak bangbangin nong bawl thei ding uh hi,” a ci uh hi.

11 A zingciangin Saul in a mite khen thum suah a; zana vil nunungpen laitakin Ammon-te giahphual luh a nisat hun dong a ngawng-at uh hi. A nungta lai sunte nih nangawn a omkhawm lo zahin a kithehthang uh hi.

Kumpi in Saul Kikipsak

12 Tua ciangin mite in Samuel kiangah, “‘Saul in eite hong uk ding maw?’ a ci kua hiam? A ci mite ko kiangah hong puak un, ka that ding uh hi,” a ci uh hi. ^e

13 Ahi hangin Saul in, “Tuni-in TOPA in Israel hukhia ahi manin kuamah a kithat kei ding hi,” a ci hi. ^f

14 Tua ciangin Samuel in mite kiangah, “Hong pai un, Gilgal ah pai-in kumpi-suahna va kipsak kik ni,” a ci hi. 15 Tua ciangin Gilgal ah mi khempeuh pai uh a, TOPA mai-ah kumpi dingin Saul a kipsak uh hi. Tua lai-ah amaute in TOPA mai-ah kilawmtakna biakna ^{▼▼11.15 Tang ngeina-in kilemna biakna} pia uh a, Saul le Israel-te khempeuh in pawi lianpi bawlin a ai uh hi.